दुचाकीस्वार महिलेला ट्रकने चिरडले
महिलेचा जागीच मृत्यू
कुडाळ: होळीच्या सणानिमित्त सर्वत्र उत्साहाचे वातावरण असतानाच, कुडाळ-मालवण रस्त्यावरील नाबरवाडी येथे एक अत्यंत हृदयद्रावक घटना घडली आहे. दुचाकी आणि ट्रक यांच्यात झालेल्या भीषण अपघातात नेरूर येथील नीलम निलेश मेस्त्री या महिलेचा जागीच मृत्यू झाला. ऐन सणासुदीच्या दिवशी घडलेल्या या घटनेमुळे कुडाळ आणि नेरूर परिसरात मोठी हळहळ व्यक्त होत आहे.
नेमकी घटना काय?
मिळालेल्या माहितीनुसार, नीलम मेस्त्री या आज सकाळी ११:१५ वाजताच्या सुमारास आपल्या दुचाकीने कुडाळहून नेरूरच्या दिशेने जात होत्या. नाबरवाडी येथे पोहोचल्या असता, त्यांची दुचाकी घसरून त्या रस्त्यावर फेकल्या गेल्या. त्याच वेळी कुडाळच्या दिशेने येणाऱ्या एका वेगात असलेल्या ट्रकच्या चाकाखाली त्या दुर्दैवाने सापडल्या. हा अपघात इतका भीषण होता की, त्यांचा घटनास्थळीच मृत्यू झाला.
नागरिकांची गर्दी आणि पोलीस कारवाई
अपघाताची माहिती मिळताच परिसरातील नागरिकांनी घटनास्थळी मोठी गर्दी केली होती. कुडाळ पोलिसांनी तातडीने धाव घेत घटनेचा पंचनामा केला आणि मृतदेह उत्तरीय तपासणीसाठी पाठवला आहे. या प्रकरणी पोलिसांनी पुढील कायदेशीर कार्यवाही सुरू केली असून ट्रक चालकाबाबत अधिक तपास सुरू आहे.
सणादिवशीच पसरली शोककळा
आज सर्वत्र होळीचा सण साजरा केला जात असताना, या अपघातामुळे मेस्त्री कुटुंबावर दुःखाचा डोंगर कोसळला आहे. एका कर्तव्यदक्ष महिलेचा अशा प्रकारे अपघाती मृत्यू झाल्याने संपूर्ण नेरूर गावात शोककळा पसरली आहे.
Subscribe
