साळगाव : विद्यार्थ्यांच्या शैक्षणिक प्रगतीसाठी माजी विद्यार्थ्यांचा कौतुकास्पद पुढाकार
जिल्हा परिषद पूर्ण प्राथमिक शाळा साळगाव नं. २ येथील शैक्षणिक व प्रशासकीय कामकाज अधिक सक्षम आणि सुलभ व्हावे, या उद्देशाने शाळेला माजी विद्यार्थ्यांकडून कॉम्प्युटर व ऑफिस टेबल अशी मौल्यवान भेट देण्यात आली.
शाळेचे माजी विद्यार्थी तसेच सेवानिवृत्त वर्ग-१ अधिकारी श्री. बबन गायचोर यांनी शाळेला कॉम्प्युटर भेट दिला. आजच्या डिजिटल युगातील शिक्षणाची गरज ओळखून त्यांनी केलेले हे योगदान विद्यार्थ्यांसाठी तसेच शाळेच्या शैक्षणिक व प्रशासकीय कामकाजासाठी अत्यंत उपयुक्त ठरणार आहे.
तसेच शाळेचे माजी विद्यार्थी व पालक श्री. व सौ. सुवर्णा केशव माळकर यांनी शाळेला ऑफिस टेबल भेट दिले. शाळेच्या गरजा लक्षात घेऊन त्यांनी केलेले हे सहकार्य शाळेच्या कार्यालयीन कामकाजासाठी निश्चितच मोलाचे ठरणार आहे.
या दोन्ही दात्यांनी शाळेशी असलेले आपले जिव्हाळ्याचे नाते जपत शाळेच्या विकासासाठी दिलेले योगदान निश्चितच कौतुकास्पद व प्रेरणादायी आहे. त्यांच्या या सहकार्यामुळे शाळेच्या सुविधांमध्ये भर पडली असून, शाळेच्या प्रगतीला निश्चितच चालना मिळणार आहे.
या प्रसंगी शाळेच्या मुख्याध्यापक, शिक्षकवृंद, शाळा व्यवस्थापन समिती,विद्यार्थी व पालक यांच्या वतीने श्री. बबन गायचोर तसेच श्री. व सौ. सुवर्णा केशव माळकर यांचे मनःपूर्वक आभार व्यक्त करण्यात आले.
“माजी विद्यार्थी व पालकांनी शाळेच्या विकासासाठी दिलेले योगदान हे केवळ वस्तूंचे दान नसून, शाळेच्या उज्ज्वल भविष्यासाठी दिलेला विश्वास आणि आधार आहे,” असे गौरवोद्गार शाळा मुख्याध्यापकांच्या वतीने व्यक्त करण्यात आले.
शाळेच्या विकासासाठी आणि विद्यार्थ्यांच्या उज्ज्वल भविष्यासाठी असेच सहकार्य व योगदान भविष्यातही मिळत राहावे, अशी अपेक्षा यावेळी व्यक्त करण्यात आली.
Subscribe
