वनविभागाच्या गाडीला ग्रामस्थांनी रोखलं
दोडामार्ग : तालुक्यातील मोर्ले गावामध्ये शुक्रवारी उशिरा संध्याकाळी एका शेतकऱ्यावर हत्तीने पाठलाग करत हल्ला केल्याची धक्कादायक घटना घडली. या घटनेमुळे संतप्त झालेल्या ग्रामस्थांनी गावात दाखल झालेल्या वनविभागाच्या कर्मचाऱ्यांची गाडी अडवली. जोपर्यंत वरिष्ठ अधिकारी येत नाहीत, तोपर्यंत कर्मचाऱ्यांना परत जाऊ देणार नाही, असा इशाराही त्यांनी दिला आहे.
गेल्या काही दिवसांपासून मोर्ले परिसरात दिवसाढवळ्या हत्तींचा वावर वाढला आहे, ज्यामुळे शेतीत काम करणे शेतकऱ्यांसाठी धोकादायक बनले आहे. शुक्रवारी नामदेव सुतार नावाचे शेतकरी त्यांच्या काजूच्या बागेत काम करत असताना अचानक एका हत्तीने त्यांच्यावर पाठलाग करत हल्ला केला. यावेळी त्यांच्यासोबत त्यांची पत्नी आणि मुलगा देखील होते. सुदैवाने तिघेही या हल्ल्यातून बचावले.
या घटनेची माहिती मिळताच वनविभागाचे कर्मचारी घटनास्थळी पोहोचले. मात्र, हत्तीचे चुकीचे लोकेशन दिल्यामुळे हा प्रकार घडला असल्याचा आरोप ग्रामस्थांनी केला. यामुळेच संतापलेल्या ग्रामस्थांनी वनविभागाच्या गाडीला घेराव घातला. यावेळी उपसरपंच संतोष मोर्ये, माजी उपसरपंच पंकज गवस, माजी उपसरपंच नामदेव सुतार आणि इतर स्थानिक शेतकरी तसेच ग्रामस्थ उपस्थित होते.
Subscribe
