बिडवलकर खून प्रकरणी चारही आरोपींना न्यायालयीन कोठडी
कुडाळ : सिद्धिविनायक उर्फ प्रकाश बिडवलकर खून प्रकरणी पोलीस कोठडीत असलेल्या गणेश कृष्णा नार्वेकर व सर्वेश भास्कर केरकर या दोन आणि पोलीस कोठडीचा अधिकार पोलिसांनी मागणी केल्याने न्यायालयीन कोठडीत असलेल्या सिद्धेश अशोक शिरसाट व अमोल श्रीरंग शिरसाट या दोन अशा एकूण चारही संशयितांना न्यायालयीन कोठडीत ठेवण्याचे आदेश कुडाळ न्यायालयाने दिले आहेत. सिद्धेश अशोक शिरसाट आणि अमोल श्रीरंग शिरसाट यांना २४ एप्रिल पर्यंत तर मंगेश कृष्णा नार्वेकर व सर्वेश भास्कर सर्वेकर यांना २८ एप्रिल पर्यंत न्यायालयीन कोठडी मिळाली आहे. संशयित आरोपी सिद्धेश शिरसाट हा आजारी असल्याने कोल्हापूर येथे ऍडमिट होता, त्याला आज डिस्चार्ज दिल्याने त्याची रवानगी सावंतवाडीच्या कारागृहात होणार आहे.
दरम्यान या प्रकरणात वापर झालेल्या दोन वाहनांपैकी संशयितांनी प्रकाश बिडवलकरचा मृतदेह कुडाळहुन सातार्डाला नेताना वापरलेले वाहन पोलिसांनी ताब्यात घेतले आहे. या वाहनाच्या मालकाची कसून चौकशी पोलिसांनी केली आहे, अशी माहिती पोलिसांनी दिली.
प्रकाश बिडवलकर खून प्रकरणातील चारही संशयितांची पोलीस कोठडी मंगळवारी संपली होती. मात्र प्रकृती अस्वास्थ्यामुळे अमोल शिरसाट व सिध्देश शिरसाट या दोघांना यापुर्वीच पोलीस कोठडी अबाधित राखून २४ एप्रिल पर्यन्त न्यायालयाने न्यायालयीन कोठडीत ठेवण्याचे आदेश दिले होते, तर उर्वरित संशयित आरोपी गणेश कृष्णा नार्वेकर व सर्वेश भास्कर केरकर या दोघांची पोलिस कोठडीची मुदत आज मंगळवारी संपली होती, त्यामुळे चार पैकी दोन्ही संशयित आरोपींना कुडाळ न्यायालयात आज मंगळवारी हजर केले असता, न्यायालयाने पोलिस कोठडी अबाधित राखून दोन्ही संशयितांना २८ एप्रिल पर्यंत न्यायालयीन कोठडीत ठेवण्याचे आदेश दिले आहेत.दरम्यान यातील पोलीस तपासात वेगवेगळे विषय समोर येत आहेत. यात प्रकाश बिडवलकर याचा खून केल्यानंतर त्याचा मृतदेहाची विल्हेवाट लावण्यासाठी एकूण दोन गाड्यांचा वापर करण्यात आला होता. यातील एक ईर्टीका गाडी पोलिसांनी सोमवारी जप्त केली आहे. ही ईर्टीका गाडी कुडाळ बाजारपेठ येथील इम्रान ईस्मान शेख याची असल्याचे स्पष्ट झाले आहे. संशयित आरोपी क्रमांक एक सिद्धेश शिरसाट याच्याच सांगण्यावरून इम्रान शेख याने ही गाडी दिली होती. गाडी नेताना कशासाठी हे कारण सांगितले नव्हते. तसेच ही गाडी विना चालक या तत्वावर दिली होती. त्यामुळे या गाडीचा वापर सिध्देशने कशासाठी केला ? याची इम्रान शेख यांना कोणतीच कल्पना शेवटपर्यंत दिली नाही. यासाठी २ हजार २०० रू भाडे इम्रान शेख यांना दिले होते. दरम्यान यातील दुसऱ्या गाडीचा शोध पोलीस घेत आहेत.या खून प्रकरणाचा सर्वच तपास चारच संशयितांभोवती घुटमळला आहे. यामध्ये पोलिसांनी यात अजून आरोपी असण्याची शक्यता व्यक्त केली आहे. या प्रकरणातील संशयित आरोपी क्रमांक सिद्धेश शिरसाट याच्यावर कोल्हापूर येथे उपचार सुरू होते. त्याला आजच डिस्चार्ज मिळाला असून त्याला सावंतवाडी येथील कारागृहात हलविण्यात येणार आहे. तसेच सिद्धेश शिरसाटचा मोबाईल अद्याप प्राप्त झाला नसल्याची माहिती तपासी अधिकारी भीमसेन गायकवाड यांनी सांगितले.
Subscribe
