सारथी मार्फत १५०० मराठा व कुणबी तरुणांना वाहन चालक प्रशिक्षण उपक्रम.

Post Views: 143

प्रशिक्षित वाहन चालकांबाबत देशात व देशाबाहेर दिवसेंदिवस मोठ्या प्रमाणात मागणी होत आहे. प्रशिक्षित वाहन चालक उपलब्ध करण्यासाठी सारथी संचालक मंडळाने “सरदार सुर्याजी काकडे सारथी वाहन चालक कौशल्य विकास प्रशिक्षण कार्यक्रम” राबविण्यास मंजूरी दिली. त्या नुसार महाराष्ट्रातील मराठा, कुणबी, कुणबी-मराठा व मराठा-कुणबी समाजातील १५०० व्यक्तींना दर वर्षी लाईट मोटर व्हेईकल व हेवी ट्रान्सपोर्ट व्हेईकल चालविण्याचे कौशल्य विकास प्रशिक्षण देण्यात येईल. या तरुण-तरुणींना रोजगार व स्वयंरोजगारासाठी संधी केंद्रीय रस्ते वाहतूक आणि महामार्ग मंत्रालय यांच्या रस्ता सुरक्षा अंतर्गत उपक्रमांतर्गत असलेल्या आय.डी.टी.आर. पुणे या केंद्र शासनाच्या संस्थेमार्फत एका महिन्याचे प्रशिक्षण विनामुल्य देण्यात येईल. दररोज आठ तासासाठी हे प्रशिक्षण राहील त्यामध्ये वाहनांचे भाग त्याचे देखभाल व दुरुस्ती तसेच ड्रायव्हिंगचे भारतातील व परदेशातील नियमांची माहिती देण्यात येईल दररोज क्षेत्रीय स्तरावर सराव व प्रशिक्षण देण्यात येईल. या विद्यार्थ्यांना एका प्रशिक्षण महिन्यासाठी रुपये १० हजार चे विद्यावेतन देण्यात येईल.

मा. अध्यक्ष सारथी श्री. अजित निंबाळकर (भाप्रसे, से.नि.) माजी मुख्य सचिव महाराष्ट्र राज्य याच्या अध्यक्षतेखाली सर्व संचालक मंडळाने दिनांक १७ डिसेंबर २०२४ रोजी च्या संचालक मंडळाच्या बैठकीत या योजनेला मान्यता दिली. हे प्रशिक्षण छत्रपती शिवाजी महाराजांच्या जयंतीच्या दिवशी दिनांक १९ फेब्रुवारी २०२५ पासून सुरू करण्याचे निर्देश दिले आहे.

महाराष्ट्रातील ग्रामीण भागात तसेच परदेशात या माध्यमातून रोजगाराची संधी मोठ्या प्रमाणात निर्माण होणार आहे. याकरिता जास्तीत जास्त सारथी लक्षीत गटातील व्यक्तींनी या प्रशिक्षणाचा लाभ घ्यावा असे आवाहन श्री. अशोक काकडे (भाप्रसे) व्यवस्थापकीय संचालक, सारथी यांनी केले आहे.