नगराध्यक्ष संदेश पारकर यांचे आवाहन
कणकवली : मालवणी खाद्य संस्कृतीतील पारंपरिक पदार्थांना व्यावसायिक स्वरूप देऊन महिला बचत गटांनी स्वतःचा स्वतंत्र ब्रँड निर्माण करावा, असे आवाहन कणकवलीचे नगराध्यक्ष संदेश पारकर यांनी केले आहे. ते कणकवली येथील चौंडेश्वरी सभागृहात पार पडलेल्या ‘हिरकणी लोकसंचालित साधन केंद्राच्या’ १६ व्या वार्षिक सर्वसाधारण सभेच्या उद्घाटनप्रसंगी बोलत होते.
महिला आर्थिक विकास महामंडळ, सिंधुदुर्ग यांच्या मार्गदर्शनाखाली ही सभा संपन्न झाली. या कार्यक्रमास नगराध्यक्ष संदेश पारकर यांच्यासह पंचायत समिती सभापती हर्षवर्धन वाळके, पंचायत समिती सदस्य बाबलू सावंत तसेच तालुक्यातील महिला उद्योजिका आणि बचत गटांच्या प्रतिनिधी मोठ्या संख्येने उपस्थित होत्या.
कार्यक्रमातील प्रमुख मुद्दे
स्वतंत्र ब्रँडची निर्मिती : मालवणी खाद्यपदार्थांना आधुनिक विपणनाची (Marketing) जोड दिल्यास महिला उद्योजकतेला मोठी चालना मिळेल, असे मत नगराध्यक्ष संदेश पारकर यांनी व्यक्त केले.
शासकीय योजनांची माहिती : कार्यक्रमात महिला सक्षमीकरणासाठी शासनाकडून राबविण्यात येणाऱ्या विविध योजनांची माहिती देण्यात आली.
जिल्हा उद्योग केंद्राच्या उद्योग निरीक्षक श्रीमती मिरशी गेंडे यांनी उद्योग विभागाच्या योजनांचे मार्गदर्शन केले.
बँक of इंडियाचे शाखा व्यवस्थापक अर्जुन सर यांनी बँकिंग व कर्ज योजनांची माहिती दिली.
तालुका कृषी अधिकारी विनायक पाटील यांनी कृषी विभागाच्या योजनांबाबत मार्गदर्शन केले.
’पुरुष सुधारक सन्मान’ पुरस्कार वितरण : महिलांच्या सक्षमीकरणात योगदान देणाऱ्या आणि पुरुषांच्या सकारात्मक सहभागाचे महत्त्व अधोरेखित करणाऱ्या या अभिनव उपक्रमांतर्गत उत्कृष्ट कार्य करणाऱ्यांना मान्यवरांच्या हस्ते सन्मानित करण्यात आले.
अहवाल प्रकाशन: कार्यक्रमादरम्यान ‘सिंधू कृषी महिला शेतकरी उत्पादक कंपनी’च्या अहवालाचे प्रकाशन करण्यात आले. तसेच महिलांच्या उत्पादनांना शाश्वत बाजारपेठ मिळवून देण्यासाठी सर्वतोपरी सहकार्य करण्याचे आश्वासन मान्यवरांनी दिले.
नियोजन आणि संयोजन : महिला आर्थिक विकास महामंडळाचे जिल्हा समन्वय अधिकारी अमरीश मिरझे यांनी मागील वर्षातील कामकाजाचा आढावा सादर केला. कार्यक्रमाचे सूत्रसंचालन साधन केंद्राच्या व्यवस्थापक सीमा गावडे यांनी केले, तर यशस्वीतेसाठी लेखापाल आराध्या परब, विकास सल्लागार अथर्व मेस्त्री व इतर कर्मचाऱ्यांनी विशेष परिश्रम घेतले.
Subscribe
