दुचाकीची टेम्पोला धडक, कर्नाटकचा तरुण गंभीर जखमी
सिंधुदुर्गनगरी : मुंबई-गोवा राष्ट्रीय महामार्गावर ओरोस परिसरात अपघातांची मालिका सुरूच असून, शनिवारी (दि. ११) दुपारी एक भीषण अपघात घडला. जिजामाता चौकासमोरील मिडल कटजवळ गॅस एजन्सीच्या टेम्पोला दुचाकीने मागून जोरदार धडक दिली. या अपघातात मूळचा कर्नाटक येथील तरुण गंभीर जखमी झाला असून त्याला अधिक उपचारासाठी गोवा-बांबुळी येथे हलवण्यात आले आहे.
नेमकी घटना काय?
मिळालेल्या माहितीनुसार, ब्रम्हानंद लांबर हा तरुण त्याच्या पल्सर मोटारसायकलवरून ओरोसहून कुडाळच्या दिशेने जात होता. दुपारी ३ वाजण्याच्या सुमारास, जिजामाता चौकातील मिडल कटवर एक गॅस एजन्सीचा टेम्पो वळण घेत असताना, मागून येणाऱ्या ब्रम्हानंदच्या पल्सरने त्याला जोरदार धडक दिली. ही धडक इतकी भीषण होती की ब्रम्हानंद रस्त्यावर फेकला जाऊन त्याला गंभीर दुखापत झाली.
तातडीने मदत आणि उपचार
अपघाताची माहिती मिळताच महामार्ग वाहतूक पोलिसांनी घटनास्थळी धाव घेतली. जखमी तरुणाला तातडीने रुग्णवाहिकेने जिल्हा रुग्णालयात दाखल करण्यात आले. मात्र, त्याची प्रकृती चिंताजनक असल्याने प्राथमिक उपचारानंतर त्याला पुढील उपचारासाठी गोवा येथील बांबुळी रुग्णालयात हलवण्यात आले आहे.
वाहतूक पोलिसांची कारवाई
ओरोस पोलीस ठाण्याचे पोलीस अंमलदार तातडीने घटनास्थळी पोहोचले. त्यांनी महामार्गावरील अपघातग्रस्त वाहने बाजूला करून विस्कळीत झालेली वाहतूक सुरळीत केली. या प्रकरणाचा पुढील तपास ओरोस पोलीस करत आहेत
नागरिकांमध्ये चिंतेचे वातावरण
ओरोस परिसरात गेल्या काही दिवसांपासून अपघातांचे प्रमाण कमालीचे वाढले आहे. महामार्गावरील धोकादायक वळणे आणि मिडल कटमुळे वाहनचालकांच्या जीवाला धोका निर्माण होत आहे. प्रशासनाने या ठिकाणी वेगमर्यादा निश्चित करावी, वाहतूक नियंत्रण दिवे बसवावेत आणि अपघातप्रवण क्षेत्रांत (Black Spots) योग्य उपाययोजना कराव्यात, अशी मागणी स्थानिक नागरिकांकडून सातत्याने केली जात आहे.
Subscribe
