सिंधुदुर्ग पोलिसांची मालवणमध्ये मोठी कारवाई

Post Views: 547

१ लाख १७ हजारांचा मुद्देमाल जप्त

४ आरोपी अटकेत

मालवण : सिंधुदुर्ग स्थानिक गुन्हा अन्वेषण शाखेने (LCB) मालवण तालुक्यात मोठी कारवाई करत गांजा तस्करीचा पर्दाफाश केला आहे. या कारवाईत पोलिसांनी चार आरोपींना अटक केली असून त्यांच्याकडून गांजा, दोन मोटरसायकल, सहा मोबाईल आणि इतर वस्तू असा एकूण १ लाख १७ हजार ७०० रुपयांचा मुद्देमाल जप्त केला आहे.

मिळालेल्या माहितीनुसार, गुरुवारी, ३१ जुलै २०२५ रोजी रात्री ८:१५ च्या सुमारास सिंधुदुर्ग LCB च्या पथकाने मालवण तालुक्यातील वराड, कुसरवे येथे छापा टाकला. यावेळी पोलिसांनी संशयित आरोपी संदीप विनायक परब (वय ४१), अविरत गणेश ढवण (वय ३१), हेमंत अनिल भोगले (वय २४), आणि आकाश शिवाजी निकम (वय २४) यांना ताब्यात घेतले.

या आरोपींच्या झडतीमध्ये पोलिसांना २६२ ग्रॅम गांजा (किंमत ७,२०० रुपये), दोन मोटारसायकल, सहा मोबाईल आणि इतर वस्तू असा एकूण १ लाख १७ हजार ७०० रुपयांचा मुद्देमाल सापडला. पोलिसांनी हा सर्व मुद्देमाल जप्त केला असून चारही आरोपींविरोधात मालवण पोलीस ठाण्यात गुन्हा दाखल करण्यात आला आहे.

ही कारवाई पोलीस अधीक्षक डॉ. मोहन दहिकर आणि अपर पोलीस अधीक्षक कुमारी नयोमी साटम यांच्या मार्गदर्शनाखाली करण्यात आली. यामध्ये पोलीस निरीक्षक कोल्हे, पीएसआय हाडळ, जीपीएसआय शेळके, तसेच हवालदार कदम, तवटे, देसाई, डिसोझा, खानोलकर, कांडर आणि पोलीस कॉन्स्टेबल कांबळे यांच्या पथकाने महत्त्वाची भूमिका बजावली. या घटनेमुळे मालवण परिसरात खळबळ उडाली असून पोलीस पुढील तपास करत आहेत.