बनावट इन्स्टाग्राम अकाउंट काढून अश्लील चॅटिंग

Post Views: 346

सावंतवाडीतून एकाला अटक

सावंतवाडी : इन्स्टाग्रामवर बनावट अकाउंट तयार करून एका युवतीसोबत अश्लील संभाषण केल्याप्रकरणी एका तरुणाला सावंतवाडी शहरातून अटक करण्यात आली आहे. संजय कृष्णा जाधव (वय २५, रा. कारिवडे) असे अटक करण्यात आलेल्या तरुणाचे नाव आहे. कुडाळ आणि सावंतवाडी पोलिसांच्या संयुक्त पथकाने ही कारवाई काल रात्री साडे दहाच्या सुमारास शहरातील शिरोडा नाका परिसरात केली.

मिळालेल्या माहितीनुसार, संशयित आरोपी जाधव याने एका युवतीच्या नावाने इन्स्टाग्रामवर एक बनावट अकाउंट तयार केले होते. या अकाउंटवरून त्याने कुडाळ तालुक्यातील एका युवतीला अश्लील मेसेज पाठवून चॅटिंग केले. हा प्रकार लक्षात आल्यावर संबंधित युवतीने याचा विरोध केला. त्यानंतर जाधवने तिला धमकावण्यास सुरुवात केली.

या प्रकारानंतर घाबरलेल्या युवतीने तातडीने कुडाळ पोलिसांत तक्रार दाखल केली. पोलिसांनी या तक्रारीची गंभीर दखल घेत जाधवच्या विरोधात गुन्हा दाखल केला आणि त्याचा शोध सुरू केला. तपास करत असताना पोलिसांना जाधव सावंतवाडीतील शिरोडा नाका परिसरात एका भाड्याच्या फ्लॅटमध्ये राहत असल्याची माहिती मिळाली. या माहितीच्या आधारे कुडाळ आणि सावंतवाडी पोलिसांनी संयुक्तपणे सापळा रचला. रात्री उशिरा पोलिसांनी फ्लॅटवर छापा टाकून जाधव याला ताब्यात घेतले.

अटक करण्यात आलेल्या जाधवची पुढील चौकशी सुरू असून, त्याच्या मोबाईलमधील डेटा तपासला जात आहे. या प्रकरणातून आणखी काही धक्कादायक माहिती समोर येण्याची शक्यता पोलिसांनी व्यक्त केली आहे.