कुडाळ-कविलकाटे येथील गांजा प्रकरणी तिसरा संशयित उभादांडा येथून ताब्यात

Post Views: 184

घरातही मिळाला दीडशे ग्रॅम गांजा; आज न्यायालयात हजर करणार

कुडाळ : कुडाळ-कविलकाटे रायकरवाडी येथील गांजा प्रकरणातील तिसरा संशयित, प्रितेश रोहीदास मसुरकर (३२, रा. उभादांडा तालुका वेंगुर्ले) याला कुडाळ पोलिसांनी त्याच्या उभादांडा येथील राहत्या घरातून ताब्यात घेतले आहे. पोलिसांनी त्याच्या घराची झडती घेतली असता, त्यांना सुमारे १५० ग्रॅम वजनाचा गांजा सापडला, जो जप्त करण्यात आला आहे. प्रितेश मसुरकरला आज (रविवार) न्यायालयात हजर करण्यात येणार आहे. या प्रकरणाची सुरुवात ४ जुलै रोजी झाली होती, जेव्हा कुडाळ पोलिसांनी कविलकाटे, रायकरवाडी येथील विशाल सुरेश वाडेकर याच्या घरावर छापा टाकून १ किलो ६८० ग्रॅम वजनाचा (सुमारे ५२ हजार रुपये किमतीचा) गांजा जप्त केला होता. विशाल वाडेकर हा गांजा विक्रीसाठी आणत असल्याची गुप्त माहिती कुडाळ पोलिसांना मिळाली होती. या माहितीच्या आधारे कुडाळचे पोलीस निरीक्षक राजेंद्र मगदूम यांनी वरिष्ठांच्या आदेशान्वये कारवाई करत विशालला ताब्यात घेऊन अटक केली होती. त्यानंतर, विशाल वाडेकरकडून मिळालेल्या माहितीनुसार, पोलिसांनी १६ जुलै रोजी केतन आनंद सुकी (रा. वेंगुर्ले) या दुसऱ्या आरोपीला ताब्यात घेऊन अटक केली आणि त्याला पोलीस कोठडीत ठेवण्याचे आदेशही दिले होते. आता याच माहितीच्या आधारे कुडाळ पोलिसांच्या पथकाने वेंगुर्ले तालुक्यातील उभादांडा येथील प्रितेश मसुरकरच्या राहत्या घरावर छापा टाकला. यावेळी पोलिसांनी घेतलेल्या झडतीत त्याच्या घरी सुमारे दीडशे ग्रॅम वजनाचा गांजाही सापडला. पोलिसांनी कविलकाटे आणि त्याच्या राहत्या घरी सापडलेल्या गांजा प्रकरणी प्रितेश मसुरकरला ताब्यात घेतले असून, त्याला आज न्यायालयात हजर करण्यात येणार आहे. या घटनेचा अधिक तपास पोलीस निरीक्षक राजेंद्र मगदूम यांच्या मार्गदर्शनाखाली पोलीस उपनिरीक्षक प्रवीण धडे करत असल्याची माहिती कुडाळ पोलिसांनी दिली.