कुडाळ तहसीलदार कार्यालयात सूचना पेटी

Post Views: 197

तहसीलदार वीरसिंग वसावे यांचा पुढाकार

कुडाळ :- तहसील कार्यालयात विविध कामांसाठी नागरिक येत असतात. त्यांच्या प्रशासनाबाबत काही सूचना असतात किंवा काही तक्रारी देखील असतात. त्या तक्रारी आणि सूचना नागरिकांना थेट तहसीलदारांपर्यंत पोहोचवता याव्यात यासाठी कुडाळ तहसीलदार वीरसिंग वसावे यांनी आजपासून तहसीलकार्यालयात सूचना पेटी कार्यान्वित केली आहे. नागरिकांनी त्यांच्या सूचना किंवा तक्रारी काही असतील तर त्या या पेटित टाकाव्यात असं आवाहन तहसीलदार वीरसिंग वसावे यांनी केले आहे.

तहसील कार्यालय हे नेहमी गजबजलेले असते. अनेक नागरिक आपली विविध कामे घेऊन तहसील कार्यालयात येत असतात. काहींची कामे होतात. काहींची रेंगाळतात. अशावेळी आपल्या मनातील भावना, आपल्या सूचना, तक्रारी थेट तहसीलदारांपर्यंत कशा पोहोचवाव्यात हा प्रश्न असतो. कारण बऱ्याच वेळा तहसीलदार विविध प्रशासकीय कामानिमित्ताने कार्यालयात नसतात. किंवा कार्यालयात असलात तरी विविध केसेस सुरु असल्याने सामान्य नागरिकांना तहसीलदारणाची भेट घेता येत नाही. त्यासाठी कुडाळचे तहसीलदार वीरसिंग वसावे यांनी हा सूचना पेटीचा उपक्रम सुरु केला आहे. तहसीलदार दालनाच्या बाहेरच हि सूचना पेटी बसविण्यात आली. या सूचना पेटीची चावी तहसीलदार वीरसिंग वसावे यांच्या कडेच राहणार आहे. ज्यावेळी या पेटित पडलेली तक्रार किंवा सूचना दिसेल त्यावेळी तात्काळ हि पेटी उघडून तहसीलदार तात्काळ त्याची दखल घेणार आहेत. त्यामुळे नागरिकांनी आपल्या सूचना, तक्रारी असतील तर या पेटीत टाकाव्यात असे आवाहन तहसीलदार वीरसिंग वसावे यांनी केले आहे. यावेळी महसूल अधिकारी व कर्मचारी उपस्थित होते.