आत्महत्या की घातपात ?
चर्चांना उधाण
मालवण : वायंगणी येथून बेपत्ता असलेल्या एका २८ वर्षीय विवाहितेचा मृतदेह हडी कालावल पुलाजवळ खाडीकिनारी झाडाच्या वेलीला लटकलेल्या अवस्थेत आढळून आला आहे.सौ. अंतरा हर्षद दुखंडे असे मृत महिलेचे नाव आहे. या घटनेने परिसरात खळबळ उडाली आहे. दरम्यान घटनास्थळावरील स्थिती पाहता ही आत्महत्या की घातपात याबाबत संशय व्यक्त केला जात आहे.
मूळची भांडुप पश्चिम-मुंबई येथील असलेली अंतरा दुखंडे ही सध्या आपल्या सासरी वायंगणी- दुखंडेवाडी येथे राहत होती. ती आचरा येथे शिक्षिका म्हणून सेवेत होती. २२ फेब्रुवारीला पहाटे ३.३० ते ३.४५ वाजण्याच्या सुमारास ती आपल्या घरातून कपडे, बॅग आणि मोबाईलसह कोणालाही काहीही न सांगता निघून गेली होती. याप्रकरणी आचरा पोलीस ठाण्यात २३ फेब्रुवारीला रात्री ११.१९ वाजता ती बेपत्ता असल्याची नोंद करण्यात आली होती. आज हडी कालावल पुलाजवळ खाडीकिनाऱ्यालगत असलेल्या झाडाच्या वेलीला अंतराचा मृतदेह लटकलेल्या, मात्र जमिनीला टेकलेल्या अवस्थेत मिळून आला.
घटनेची माहिती मिळताच पोलिसांनी घटनास्थळी धाव घेतली. मृतदेहाची ओळख तिचे पती हर्षद मोहन दुखंडे यांनी पटवली आहे. या घटनेबाबत येथील पोलीस ठाण्यात आकस्मिक मृत्यू म्हणून नोंद करण्यात आली आहे. पोलिसांनी पंचनामा करून मृतदेह शवविच्छेदनासाठी पाठवला आहे. अधिक तपास पोलीस निरीक्षक मारुती जगताप यांच्या मार्गदर्शनाखाली सहायक पोलीस निरीक्षक गणेश माने, सुशांत पवार करत आहेत. दरम्यान उदय दुखंडे यांनी या प्रकरणाची सखोल चौकशी व्हावी, अशी मागणी पोलिसांकडे केली आहे. त्याचबरोबर आपण येईपर्यंत अंतराच्या मृतदेहाचे शवविच्छेदन करण्यात येऊ नये असे तिच्या आईने सांगितले असल्याचे श्री. दुखंडे यांनी सांगितले.
Subscribe
