७१३ उमेदवारांचे नामनिर्देशन पत्र दाखल
सिंधुदुर्ग जिल्ह्यात आगामी जिल्हा परिषद आणि पंचायत समितीच्या सार्वत्रिक निवडणूक २०२६ ची रणधुमाळी सुरू झाली असून, २१ जानेवारी २०२६ पर्यंत उमेदवारी अर्ज दाखल करण्याची प्रक्रिया मोठ्या उत्साहात पार पडली. प्राप्त झालेल्या अधिकृत आकडेवारीनुसार, संपूर्ण जिल्ह्यातून एकूण ७१३ नामनिर्देशन पत्रे प्रशासनाकडे प्राप्त झाली आहेत. यामध्ये जिल्हा परिषदेच्या ५० गटांसाठी २७३ उमेदवारांनी, तर पंचायत समितीच्या १०० गणांसाठी ४४० उमेदवारांनी आपले नशीब आजमावण्यासाठी अर्ज दाखल केले आहेत.
तालुकावार अर्जांच्या संख्येचा विचार करता, सावंतवाडी तालुक्यात सर्वाधिक राजकीय चुरस पाहायला मिळत आहे. सावंतवाडीमधून जिल्हा परिषदेसाठी ६० आणि पंचायत समितीसाठी सर्वाधिक १०१ अर्ज दाखल झाले आहेत. त्यापाठोपाठ कुडाळ तालुक्यातून जिल्हा परिषदेसाठी ४८ आणि पंचायत समितीसाठी ६४ उमेदवारांनी नामांकन सादर केले आहे. जिल्ह्याच्या इतर भागातही इच्छुकांची मोठी संख्या असून कणकवलीमध्ये जिल्हा परिषदेसाठी ३७ व पंचायत समितीसाठी ६०, तर वेंगुर्ला तालुक्यात ३७ व ६२ उमेदवारांनी अर्ज भरले आहेत.
मालवण तालुक्यातून जिल्हा परिषदेसाठी २८ व पंचायत समितीसाठी ५३, देवगडमध्ये २७ व ३७, आणि दोडामार्ग तालुक्यातून २१ व ३६ अर्ज प्राप्त झाले आहेत. जिल्ह्याच्या तुलनेत वैभववाडी तालुक्यातून सर्वात कमी अर्ज आले असून, येथे जिल्हा परिषदेसाठी १५ तर पंचायत समितीसाठी २७ उमेदवारांनी आपली दावेदारी सादर केली आहे. २१ जानेवारीपर्यंतची ही आकडेवारी पाहता, जिल्ह्याच्या ग्रामीण राजकारणात मोठ्या प्रमाणावर चुरस निर्माण होणार असल्याचे स्पष्ट दिसत असून, आता सर्वांचे लक्ष अर्जांची छाननी आणि त्यानंतर होणाऱ्या प्रत्यक्ष निवडणूक प्रचाराकडे लागले आहे.
Subscribe
