प्रांताधिकारी ऐश्वर्या काळुसे यांच्या आदेशाने महसुल व आचरा पोलीस यांची संयुक्त कारवाई
मालवण : कुडाळ नंतर मालवण तालुक्यात सुद्धा अनधिकृत उत्खनन केलेली वाळु वाहतुक करणाऱ्या डंपरवर प्रांताधिकारी ऐश्वर्या काळुसे यांच्या आदेशाने शनिवारी सायंकाळी उशिरा महसुल व आचरा पोलीस यांनी संयुक्तपणे धडक कारवाई केली.या कारवाईत दोन गोवा व एक महाराष्ट्र पासिंग असे तीन डंपर ताब्यात घेतले.ताब्यात घेतलेले तिन्ही डंपर मसुरे पोलीस स्थानक आवारात लावण्यात आले आहेत.या कारवाईमुळे मालवण तालुक्यातील अनधिकृत वाळू व्यावसायिकांचे धाबे दणाणले आहेत.
कुडाळ प्रांताधिकारी ऐश्वर्या काळुसे यांना मालवण तालुक्यातील अनधिकृत वाळू उत्खनन व वाहतूक बाबत माहिती मिळाली होती,त्या पाश्र्वभूमीवर त्यांनी आपल्या यंत्रणेला कारवाईचे आदेश दिले, त्यानुसार आचरा पोलिसांना सोबत घेत महसुल यंत्रणेने मालवण मळावाडी येथील वाळू पट्यात शनिवारी धडक कारवाई केली.या कारवाई दरम्यान मालवण -मळावाडी येथील रॅम्पवर मंदार खडपकर (GAO90U835) ,संदिप रामु फटकारे (GAO9-U3044), व संदिप रामु फटकारे (MHO7AJ3072)अशा दोन मालकांच्या नावे असलेले तीन डंपर आढळून आले.कारवाई दरम्यान डंपर चालकांनी पळ काढल्याने ते पोलिसांच्या हाती लागू शकले नाहीत असे महसुल यंत्रणेच्या अधिकाऱ्यांनी सांगितले.मालवण मधील या धडक कारवाईमुळे अनधिकृत वाळू व्यावसायिक धास्तावले आहेत.शनिवारी रात्री उशिरा मंडळ अधिकारी व तलाठी यांच्याकडुन आचरा प़ोलिस स्थानकात तक्रार दाखल करण्याची कार्यवाही सुरू होती.
या कारवाईत आचरा पोलिस स्टेशनचे पोलीस उपनिरीक्षक प्रदिप पवार,मसुरे मंडळ अधिकारी दिपक शिंगरे,मसुरे महसुल सेवक सचिन चव्हाण ,ग्राम महसुल अधिकारी श्री.बांदिवडे,भागवत जाधव, दत्तात्रय खुळपे, पोलीस पाटील मळावाडी नरेश मसुरकर यांचा सहभाग होता,अशी माहिती कुडाळ प्रांताधिकारी कार्यालयाचे नायब तहसिलदार श्री.शिदे यांनी दिली.
Subscribe
