कणकवली ब्लेड हल्ल्याप्रकरणी दोघांना पोलीस कोठडी, एक फरार

Post Views: 421

कणकवली : घरात साफसफाई करण्यावरून झालेल्या वादातून एका तरुणावर ब्लेडने हल्ला केल्याप्रकरणी कणकवली पोलिसांनी दोन आरोपींना अटक केली असून, त्यांना दोन दिवसांची पोलीस कोठडी सुनावण्यात आली आहे. या प्रकरणातील एक संशयित मात्र अद्याप फरार आहे.

मंगळवारी (२९ जुलै) रात्री ९.३० वाजण्याच्या सुमारास जानवली, वाकाडवाडी येथे कल्लू रस्पाल निसाद (२६, मूळ रा. उत्तरप्रदेश) या तरुणावर प्रेमचंद्र निसाद (३५), संतराम निसाद (३८), आणि पवन निसाद (३५, सर्व रा. जानवली, वाकडवाडी, मूळ रा. उत्तरप्रदेश) या तिघांनी ब्लेडने हल्ला केला. कल्लूने घरात साफसफाई करण्यासाठी बोलावलेल्या कामगारांनी काम न केल्याचा जाब विचारल्याच्या रागातून हा हल्ला झाल्याचे समोर आले आहे.

या हल्ल्यात कल्लू निसाद जखमी झाला असून, त्याने कणकवली पोलीस ठाण्यात याबाबतची तक्रार दिली. तक्रारीनुसार, पोलिसांनी तात्काळ कारवाई करत प्रेमचंद्र निसाद आणि संतराम निसाद या दोघांना बुधवारी (३० जुलै) अटक केली. त्यांना कणकवली येथील न्यायालयात हजर केले असता, न्यायालयाने त्यांना दोन दिवसांची पोलीस कोठडी सुनावली आहे.

या प्रकरणातील तिसरा संशयित, पवन निसाद, मात्र अद्याप फरार असून पोलीस त्याचा शोध घेत आहेत. पोलीस निरीक्षक राजेंद्र नानचे या प्रकरणाचा अधिक तपास करत आहेत.