१०३ अपंगांचा रखडलेला निधी अखेर त्यांच्या खात्यात जमा
आ.निलेश राणे यांच्या पाठपुराव्याला यश
संघटनेच्या पदाधिकाऱ्यांनी मानले आभार
मालवण प्रतिनिधी: मालवण येथील पालिकेमार्फत वाटप करण्यात येत असलेला ५ टक्के अपंग निधी रखडला होता. याकडे कुडाळ मालवणचे नवनिर्वाचित आमदार निलेश राणे यांचे लक्ष वेधल्यानंतर पालिका प्रशासनामार्फत १०३ अपंगांच्या खाती निधी जमा करण्यात आला आहे. याबद्दल अपंग संघटनेचे अध्यक्ष सत्यम पाटील आणि सचिव दत्ता कामतेकर यांनी आमदार निलेश राणे यांची त्यांच्या निवासस्थानी भेट घेवून त्यांचे आभार व्यक्त केले. अशी माहिती माजी नगराध्यक्ष तथा शिवसेना जिल्हा संघटक महेश कांदळगावकर यांनी दिली.पालिकेच्या एकूण उत्पन्नातून बांधिल खर्च वजा जाता येणाऱ्या उत्पन्नाच्या ५ टक्के अपंग निधी वाटप केला जातो.
सविस्तर वृत्तांत
अपंगाच्या कल्याणासाठी २०१५ मध्ये शासननिर्णय करण्यात आला होता. त्यावेळी ३ टक्के अपंग निधी वाटप केला जात होता. २०१८ मध्ये या शासन निर्णयात सुधारणा करून अपंग निधी ५ टक्के करण्यात आला होता. त्यानुसार पालिकेला निधी वाटप करणे बंधनकारक आहे. अपंगत्वाच्या टक्केवारीनुसार तो निधी वितरित करण्यात येतो. आमच्या कालावधीमध्ये दरवर्षी चतुर्थी किंवा दिवाळीच्या दरम्यान या निधीचे वाटप केले जात होते. परंतु यावर्षी चतुर्थीला नाहीच तर अपंग संस्थेने लेखी निवेदन देवूनही दिवाळीलाही या निधीचे वितरण करण्यात आले नाही. निवडणुक आचारसहितेचा बागुलबुवा करुन निधी वाटप करण्यात आले नाही. दिवाळीच्या दरम्यान आचारसंहिता लागणार याची पूर्वकल्पना असूनही याबाबत कुठलीही आगाऊ कार्यवाही प्रशासनाकडून करण्यात आली नाही. त्यामुळे ऐन दिवाळीत अपंग बांधवाना या निधीपासून वंचित रहावे लागले. शहराच्या विकास कामात अनास्था असणाऱ्या प्रशासक अपंगाच्या बाबतीतही हेळसांड करण्यात आली.
आ.निलेश राणे यांचा यशस्वी पाठपुरावा
या अपंग निधीबाबतची माहिती प्राप्त झाल्यावर या बहुसंख्य अपंगाना घेवून निलेश राणे यांची भेट घेवून त्यांना निवेदन देवून त्यांच्या ही बाब निदर्शनास आणून दिली होती. त्यावेळी आमदार निलेश राणे यांनी आचारसंहिता संपताच लगेच हा निधी वितरित करण्याबाबत प्रशासनाला सूचना करुन निधी वितरित केला जाईल याबाबत आश्वासित केले होते. त्यानुसार आचारसंहिता संपताच शहरातील १०३ अपंगाना त्यांच्या खाती निधी जमा करण्यात आला आहे, असे कांदळगावकर यांनी म्हटले आहे.
Subscribe
