रुपेश राऊळ व सुशांत नाईक यांच्यावर महत्त्वाची जबाबदारी
सिंधुदुर्ग : आगामी विधानसभा व लोकसभा निवडणुकांच्या पार्श्वभूमीवर शिवसेना (उद्धव बाळासाहेब ठाकरे) पक्षाने सिंधुदुर्ग जिल्ह्यात संघटनात्मक पातळीवर महत्त्वपूर्ण फेरबदल करत पक्षबांधणीला गती देण्यास सुरुवात केली आहे. पक्षप्रमुख उद्धव ठाकरे यांनी जिल्ह्यातील संघटन अधिक मजबूत करण्याच्या उद्देशाने नव्या नियुक्त्या जाहीर केल्या आहेत.
या फेरबदलांनुसार सावंतवाडी विधानसभा मतदारसंघ प्रमुखपदी रुपेश राऊळ यांची पुन्हा एकदा फेरनिवड करण्यात आली आहे. तर युवासेनेचे आक्रमक व कार्यकर्त्यांमध्ये लोकप्रिय असलेले नेते सुशांत नाईक यांच्यावर थेट कणकवली विधानसभा मतदारसंघ प्रमुखपदाची महत्त्वाची जबाबदारी सोपविण्यात आली आहे.
पक्षाच्या आगामी निवडणूक रणनीतीच्या दृष्टीने या नियुक्त्यांना विशेष महत्त्व प्राप्त झाले असून, जिल्ह्यातील संघटन अधिक सक्षम करण्यासाठी नव्या पदाधिकाऱ्यांनी तळागाळात काम करण्याच्या सूचना पक्षश्रेष्ठींनी दिल्या आहेत.
दरम्यान, माजी खासदार विनायक राऊत, माजी आमदार वैभव नाईक तसेच माजी आमदार परशुराम उपरकर यांच्या मार्गदर्शनाखाली पक्षबांधणी अधिक वेगाने राबविण्याचे आदेश नवनियुक्त पदाधिकाऱ्यांना देण्यात आले आहेत.
सिंधुदुर्ग जिल्ह्यात शिवसेनेची संघटनात्मक ताकद वाढवून आगामी निवडणुकांसाठी मजबूत यंत्रणा उभी करण्याच्या दृष्टीने या नियुक्त्या महत्त्वपूर्ण मानल्या जात आहेत. पक्ष कार्यकर्त्यांमध्येही या निर्णयाचे स्वागत होत असून, येत्या काळात मतदारसंघनिहाय संघटन विस्तारावर भर दिला जाणार असल्याची माहिती पक्ष सूत्रांकडून मिळाली आहे.
Subscribe
