मालवण: येथील मेढा-कुशेवाडा परिसरात रविवारी सायंकाळी एका दुर्दैवी घटनेत विजेच्या धक्क्याने एका बैलाचा जागीच मृत्यू झाला. परिसरातील एका विद्युत फ्यूज बॉक्सला स्पर्श झाल्याने ही घटना घडली. यामुळे परिसरात भीतीचे वातावरण पसरले आहे.
ज्ञानेश्वर जनार्दन मुळेकर यांच्या मालकीचा हा बैल होता. बैलाच्या मृत्यूमुळे त्यांचे मोठे आर्थिक नुकसान झाले आहे. ही घटना कळताच स्थानिक नागरिकांनी तातडीने वीज वितरण कंपनीला माहिती दिली. त्यानंतर कर्मचाऱ्यांनी घटनास्थळी धाव घेऊन वीजपुरवठा खंडित केला. स्थानिकांच्या मदतीने वीज वितरण कंपनीच्या कर्मचाऱ्यांनी विद्युत पेटीला चिकटलेल्या बैलाला बाजूला केले. या घटनेमुळे मुळेकर यांनी नुकसान भरपाईची मागणी केली आहे. तसेच, अशा धोकादायक विद्युत पेट्यांची पाहणी करून त्या सुरक्षित करण्याची मागणी जोर धरत आहे. या घटनेमुळे महावितरणच्या कारभारावर प्रश्नचिन्ह निर्माण झाले आहे.
Subscribe
