शिवसेनेच्या पाठिंब्यामुळे शिरोडकर कुटुंबीयांची तक्रार अखेर दाखल

Post Views: 240

गुजराती व्यक्तींविरोधात पोलिसांत गुन्हा

वेंगुर्ला : वेंगुर्ला तालुक्यातील दाभोली गावडेवाडी येथील शिरोडकर कुटुंबीयांना त्यांच्या जमिनीच्या वादातून झालेल्या मारहाणीची तक्रार अखेर वेंगुर्ला पोलीस ठाण्यात दाखल झाली आहे. पाच दिवसांपूर्वी ही घटना घडली असतानाही पोलिसांनी तक्रार नोंदवून घेतली नव्हती, मात्र शिवसेना (उद्धव बाळासाहेब ठाकरे गट) माजी आमदार वैभव नाईक आणि परशुराम उपरकर यांनी पोलीस ठाण्यावर धडक दिल्यानंतर पोलिसांना ही तक्रार दाखल करण्यास भाग पाडले.

नेमके काय घडले?

स्थानिक शिरोडकर कुटुंबीयांची जमीन जबरदस्तीने ताब्यात घेण्याचा प्रयत्न गुजरातच्या अहमदाबाद येथील यशवंतकुमार अमरलाल ठक्कर यांनी केल्याचा आरोप आहे. यासाठी ठक्कर यांनी परप्रांतीय महिलांना बोलावून दिव्या शिरोडकर, संजना शिरोडकर, चंद्रभागा शिरोडकर आणि सायली शिरोडकर यांना मारहाण करण्यास लावले, असे शिरोडकर कुटुंबीयांनी सांगितले आहे. या मारहाणीचे व्हिडिओ समाजमाध्यमांवर व्हायरल झाले होते आणि स्थानिक वृत्तपत्रांमध्येही याविषयी बातम्या प्रसिद्ध झाल्या होत्या.

पोलिसांच्या भूमिकेवर प्रश्नचिन्ह

या घटनेनंतर शिरोडकर कुटुंबीयांनी तात्काळ वेंगुर्ला पोलीस ठाण्यात तक्रार दिली होती. मात्र, पोलीस निरीक्षक निसर्ग ओतारी यांनी ही तक्रार नोंदवून घेतली नाही. त्यामुळे शिवसेनेचे माजी आमदार वैभव नाईक आणि परशुराम उपरकर यांनी आज (२०२५-०७-०१) वेंगुर्ला पोलीस स्टेशनमध्ये धडक दिली. त्यांनी पोलीस निरीक्षक ओतारी यांना जाब विचारला आणि शिरोडकर कुटुंबीयांच्या महिलांना पोलीस स्टेशनमध्ये बोलावून घेत तक्रार नोंदवून घेण्यास भाग पाडले. अखेर पाच दिवसांनी या प्रकरणाची तक्रार दाखल झाली आहे.

शिरोडकर कुटुंबीयांची न्यायाची मागणी

संजना शिरोडकर आणि दिव्या शिरोडकर यांनी माध्यमांशी बोलताना आपली कैफियत मांडली. त्या म्हणाल्या की, “गुजरातचे यशवंतकुमार अमरलाल ठक्कर आणि श्रीपाद विलास महाजन हे आमच्या जमिनीमध्ये घुसून जबरदस्तीने आमची जमीन हडप करण्याचा प्रयत्न करत आहेत. ते आम्हाला धमक्या देत आहेत आणि परप्रांतीय महिलांकडून आम्हाला मारहाणही करण्यात आली. आम्ही गरीब आहोत म्हणून आम्हाला न्याय मिळत नाहीये, आम्हाला न्याय मिळाला पाहिजे.” अशी विनवणी त्यांनी केली.

शिवसेना शिरोडकर कुटुंबीयांच्या पाठीशी

यावेळी बोलताना वैभव नाईक आणि परशुराम उपरकर यांनी महायुती सरकारच्या काळात कायदा आणि सुव्यवस्थेचा प्रश्न निर्माण होत असल्याचे म्हटले. “गुजराती लोक जमिनीसाठी स्थानिकांना मारहाण करत असतील, जमिनी हडपत असतील आणि त्यांच्यावर गुन्हे दाखल होत नसतील, तर सिंधुदुर्ग जिल्ह्यात गुजरातचे प्रशासन आहे का?” असा सवाल त्यांनी उपस्थित केला. दाभोली येथील शिरोडकर कुटुंबीयांना न्याय मिळेपर्यंत शिवसेना त्यांच्या पाठीशी उभी राहील, असे आश्वासन त्यांनी दिले.

यावेळी शिवसेना उद्धव बाळासाहेब ठाकरे पक्षाचे वेंगुर्ला तालुकाप्रमुख बाळू परब, उपतालुका प्रमुख उमेश नाईक, संजय गावडे, शहर प्रमुख अजित राऊळ, युवासेना तालुकाप्रमुख पंकज शिरसाट, माजी नगराध्यक्ष संदेश निकम, माजी नगरसेवक तुषार सापळे, दाभोलीचे सरपंच उदय गोवेकर, उपसरपंच श्रीकृष्ण बांदवलकर, विवेक परब, अमित राणे, शैलेश परुळेकर, गजानन गोलतकर, संतोष शिरोडकर यांच्यासह अनेक ग्रामस्थ उपस्थित होते.