राणे कुटुंबीयांचा विकास हा आपल्या घराचे वासे बदलण्यासाठी: आ.वैभव नाईक
कुडाळ प्रतिनिधी: विधानसभा निवडणुबिगुल वाजल्यापासूनच राजकीय वर्तुळात चढाओढ पाहायला मिळत आहे.त्यातच निवडणूक उमेदवारांच्या प्रचारसभा जोरदारसुरु आहेत. कुडाळ-मालवण मतदारसंघात ठाकरे शिवसेनेचे उमेदवार तथा विद्यमान आमदार वैभव नाईक यांनी प्रचारात मुसंडी मारली आहे. यादरम्यान, कुडाळ तालुक्यात ठाकरे शिवसेनेत जोरदार इनकमिंग सुरु आहे. कुडाळ तालुक्यातील अणाव गावातील कट्टर राणे समर्थक तथा माजी उपसरपंच सदानंद अनावकर व नागरिकांनी विद्यमान आमदार वैभव नाईक, माजी आमदार परशुराम उपरकर, जिल्हाप्रमुख संजय पडते, उपजिल्हाप्रमुख अमरसेन सावंत यांच्या प्रमुख उपस्थितीत ठाकरे शिवसेनेत प्रवेश केला.
उबाठा शिवसेनेत संघटनेला महत्व: अनावकर
यावेळी बोलताना,सदानंद अनावकर म्हणाले,उबाठा शिवसेना हे एक कुटुंब आहे. उबाठा शिवसेनेत संघटनेला खूप महत्व आहे. संघटितपणे एकनिष्ठपणे राहून आपण सर्वांनी मिळून काम करूया आणि वैभव नाईक यांना अणाव गावातून जास्तीत जास्त मताधिक्य देऊन निवडून आणून पुन्हा एकदा विधानसभेवर पाठवूया. अणाव गावचा इतिहास आहे की, एकदा शब्द दिला की त्याच्याशी ठामपणे पाठिशी राहतात, असे सदानंद अणावकर यांनी म्हटले आहे. आमदार वैभव नाईक हेच विजयाची हॅट्रिक करतील, असा विश्वासही त्यांनी यावेळी व्यक्त केला. मागील दहा वर्षात अणाव गावामध्ये अनेक विकासत आमदार वैभव नाईक यांच्या विकासनिधीतून झालीआहेत. आज राज्यातील महायुतीचे सरकार हे केवळ धनाड्यांचे सरकार आहे. मात्र, सामान्य जनतेला या सरकारने काहीच दिलेले नाही. त्यामुळे पुन्हा एकदा शिवसेना पक्षप्रमुख उद्धव ठाकरे हेच मुख्यमंत्री होतील असा विश्वास त्यांनी व्यक्त केला. उद्धव ठाकरे हे मुख्यमंत्री असताना सिंधुदुर्ग जिल्ह्यासाठी मोठ्या प्रमाणात विकासकामांसाठी निधी उपलब्ध झाला. मात्र, शिंदे सरकारच्या काळात हा विकासनिधी खुंटला असल्याची टीकाही अणावकर यांनी यावेळी केली.
कुडाळ मालवणच्या विकासासाठी कटिबद्ध: वैभव नाईक
यावेळी आमदार वैभव नाईक यांनी आपण कुडाळ मालवणच्या विकासासाठी कटिबद्ध असल्याचे आश्वासन दिले. मागील १० वर्षांमध्ये कुडाळ-मालवण मतदारसंघात अनेक विकासकामे ही करण्यात आली आहेत. रस्ते, पूल, पाणी योजना या माजी मुख्यमंत्री उद्धव ठाकरे यांच्या काळात पूर्णत्वास आल्या असे सांगून शिवसेनेत प्रवेश केलेले सदानंद अणावकर आणि त्यांच्या सहकाऱ्यांचे स्वागत केले. आपण विकासासाठी शिवसेनेत आलात त्यामुळे आपला योग्य तो सन्मान राखला जाईल असेही आश्वासन आमदार वैभव नाईक यांनी यावेळी दिले.
सामान्य लोकांचे प्रश्न जवळून पाहिलेत : वैभव नाईक
मागील दहा वर्षांमध्ये या विभागाचा आमदार म्हणून काम करताना मी सामान्य लोकांचे प्रश्न काय आहेत हे जवळून पाहिले आहेत आणि ते प्रश्न सोडवण्यासाठी मी प्रामाणिक प्रयत्नही केले आहेत. परतीच्या पावसामुळे या भागातील भातशेतीचे मोठे नुकसान झाले आहे. याबाबत राज्य सरकारने लवकरात लवकर सर्वेक्षण करणे गरजेचे आहे. पाच वर्षापूर्वी सुद्धा परतीचा पावसामुळे या भागात भातशेतीचे मोठे नुकसान झाले होते. त्यावेळी तत्कालीन मुख्यमंत्री उद्धव ठाकरे यांनी सुद्धा तत्काळ भरपाई शेतकऱ्यांसाठी लागू केली होती. अणाव गावातील अनेक विकासकामे पूर्णत्वास झालेली आहेत. येथील पूल मंदिरासमोरील सुशोभीकरण, रस्ते हे पूर्ण झालेले आहेत. आम्ही सातत्याने लोकांमध्ये जात असतो आम्हाला भीती असते की, उद्या आम्ही लोकांमध्ये गेल्यानंतर लोक आम्हाला काय विचारतील त्यामुळे आम्ही नेहमीच विकासकामे करण्यावर भर देतो.
राणे कुटुंबीयांना आपल्या घराचे वासे बदलण्यासाठी विकास करायचा आहे.
यावेळी आमदार वैभव नाईक यांनी राणे कुटुंबीयांवर टीका करत म्हटले की, एकीकडे खासदार आहेत, एक मुलगा आमदार आहे. यांना तुमचा विकास करायचा नाही तर त्यांना आपल्या घराचे वासे बदलण्यासाठी विकास करायचा आहे. राणे केंद्रात मंत्री होते. परंतु त्यांनी सिंधुदुर्गजिल्ह्यात किती उद्योग आणले हे त्यांनी स्पष्ट करावे. आज नियती कशी बघा ज्या बाळासाहेबांना संपवण्याचीकरणाऱ्यांनाच आज बाळासाहेबांचा धनुष्यबाण घ्यावा लागतो. धनुष्यबाण घेताना लाचार होऊन घ्यावा लागतो. भाजप नेहमी सांगते पहिले राष्ट्र, नंतर पक्ष आणि नंतर स्वतः पण राणे हे जिथे असतात तिथे पहिला मुलगा, दुसरा मुलगा आणि तिसरी सत्ता असते. हे आपल्याला नको आहे. हे आपण जनतेपर्यंत पोहोचवले पाहिजे असे आमदार वैभव नाईक यावेळी म्हणाले.
राणे हे स्वतः धृतराष्ट्र झाले आहेत : परशुराम उपरकर
यावेळी माजी आमदार परशुराम उपरकर यांनी नारायण राणे यांच्यावर टीका करताना म्हटले की, २००५ मध्ये आपण शिवसेना सोडली असे लोकांना सांगितले. मात्र, खरे असे आहे की बाळासाहेबांनी खऱ्या अर्थाने लाथ मारली त्यावेळी राणेनी लोकांना भावनिक साथ घातली. राणे हे स्वतः धृतराष्ट्र झाले आहेत ते दुसऱ्यांना धृतराष्ट्र म्हणतात. राणे आजही मुलांचे बालहट्ट पुरवितात. नारायण राणे यांनी २००५ मध्ये शिवसेना औषधाला ठेवणार नाही, धनुष्यबाण संपवणार वक्तव्य केले होते. नियती कशी आहे बघा ! ही परशुरामाची भूमी आहे इथेच करा आणि इथेच भरा. नारायण राणे यांना चोरीचा धनुष्यबाण घ्यावा लागला आणि चोरलेली शिवसेना घ्यावी लागली हे त्यांचे दुर्दैव आहेच पण कार्यकर्त्यांचेही दुर्दैव आहे. जे त्यांचे जुने सहकारी होते त्यांचे आता डोळे उघडले आहेत. राणे आपल्यासाठी आणि आपल्या कुटुंबासाठी काम करतात हे त्यांना समजले आहे.
