विद्यार्थ्यांचे रॅगिंगसह लैंगिक शोषण; उच्चस्तरीय विद्यालयातील खळबळजनक प्रकार

Post Views: 172

पालकांची पोलिसांत धाव; जिल्हाधिकाऱ्यांचेही वेधलं लक्ष

नेहमीच या ना त्या कारणाने चर्चेत असलेल्या एका उच्चस्तरीय विद्यालयात इयत्ता आठवीच्या विद्यार्थ्यांकडून सहावी व सातवीत शिकणाऱ्या मुलांवर रॅगिंगसह लैंगिक शोषण होत असल्याचा खळबळजनक प्रकार समोर आला आहे. याबाबत संबंधित शोषित विद्यार्थ्याच्या पालकांनी सावंतवाडी पोलिस ठाण्यात धाव घेत घडलेल्या प्रकाराची माहिती दिली.

त्यानंतर सोमवारी पोलिस ठाण्यात संबंधित विद्यालयाच्या मुख्याध्यापक व हाऊस मास्टर यांना बोलावून घेत पोलिसांनी या प्रकरणाची इत्यंभूत माहिती घेतली. तर याबाबत संबंधित पालकांनी जिल्हाधिकाऱ्यांचेही लक्ष वेधत गैरवर्तन करणाऱ्या त्या विद्यार्थ्यांसह विद्यालयीन प्रशासनावर कठोर कारवाई करण्याची मागणी केली आहे.

सावंतवाडी तालुक्यातील या संबंधित विद्यालयात सिंधुदुर्ग जिल्ह्यासह जिल्ह्याबाहेरील विद्यार्थ्यांचा भरणा आहे. या विद्यालयात अलीकडेच विद्यार्थ्यांच्या जीवावर बेतणारा प्रकार घडला होता. त्यानंतर मोठी खळबळ उडाली होती. त्या प्रकारानंतर आता पुन्हा एकदा हे विद्यालय रॅगिंग आणि लैंगिक शोषणाच्या प्रकारामुळे चर्चेत आले आहे.

इयत्ता आठवीत शिकणाऱ्या विद्यार्थ्यांनी खालील इयत्तेत असलेल्या विद्यार्थ्यांवर रॅगिंग करणे, लैंगिक शोषणासह त्यांना मारहाण करणे व तक्रार केल्यास धमकी देण्यासारखे प्रकार या विद्यालयात घडल्याचे पालकांचे म्हणणे आहे. याबाबत शोषित विद्यार्थ्याच्या पालकांनी सोमवारी सावंतवाडी पोलिस ठाण्यात धाव घेत घडलेला प्रकार पोलीस निरीक्षक अमोल चव्हाण यांच्या कानावर घालत कारवाईची मागणी केली आहे.

दरम्यान, हा प्रकार डिसेंबर २०२४ मध्ये पहिल्या आठवड्यात झाला असून आठवीत शिकणाऱ्या या मुलांकडून आपल्या मुलावर शारीरिक व मानसिक छळ केला गेला आहे. शिवाय लैंगिक शोषणाचा प्रकारही घडला आहे. इतरही मुलांसोबतही हे घडत असल्याची शक्यता आहे.

याबाबत पालकांकडे तक्रार कराल तर आणखीन छळ करू अशी धमकी त्या विद्यार्थ्यांकडुन दिली गेल्याचे संबंधित पालकांनी सांगितले. त्यामुळे रॅगिंगने पीडित असणाऱ्या विद्यार्थ्यांना योग्य न्याय मिळावा व गैरवर्तन करणाऱ्या मुलांसह हाऊस मास्टर आणि मुख्याध्यापक यांच्यावर कठोर कारवाई करावी अशी मागणी त्यांनी पोलीस निरीक्षक अमोल चव्हाण यांच्याकडे केली आहे.

दरम्यान, कारवाईसाठी पालकांनी जिल्हाधिकारी यांच्याकडेही तक्रार केल्याचेही यावेळी सांगितले.

याबाबत पोलीस निरीक्षक अमोल चव्हाण यांना विचारले असता, संबंधित मुलं ही अल्पवयीन असून येथील विद्यालयात शिक्षण घेत आहेत. आज पालक व विद्यालयाचे मुख्याध्यापक व हाऊस मास्टर यांच्याशी आपली चर्चा झाली. यावेळी पालकांकडून त्यांच्या अपत्यांवर रॅगीग, लैंगिक छळ होत असल्याचे सांगितले. तर, गैरवर्तन करणाऱ्या त्या विद्यार्थ्यांना निलंबित करण्यात येणार असून विद्यालयाच्या कमिटीकडे याबाबत कळवले असल्याची माहिती मुख्याध्यापकांनी दिल्याचे ते म्हणाले.