सामूहिक घरातील जागेचा वाद जीवावर बेतला
सहा जणांवर गुन्हा दाखल
कणकवली: कणकवली तालुक्यातील दारिस्ते गावात सामायिक घरातील जागेच्या वादातून दोन कुटुंबांमध्ये जोरदार हाणामारी झाली आहे. या प्रकरणी दोन्ही गटांनी एकमेकांविरोधात तक्रार दाखल केली असून, पोलिसांनी दोन्ही बाजूंच्या एकूण सहा जणांवर गुन्हा दाखल केला आहे. ही घटना बुधवारी रात्री १० ते ११ वाजण्याच्या सुमारास घडली असून, पोलिस या प्रकरणाचा पुढील तपास करत आहेत.
नेमके काय घडले?
या प्रकरणी, दारिस्ते येथील सानिका संजय गावकर (वय ४०) यांनी पोलिसांत तक्रार दाखल केली आहे की, त्यांच्याच घरातील संदीप मधुकर गावकर, शिवदास मधुकर गावकर, आणि अंकिता संदीप गावकर यांनी त्यांना मारहाण केली. सामूहिक घराच्या जागेवरून वाद सुरू असताना, सानिका त्यांच्या वाटणीला आलेल्या पडवीत झोपल्या होत्या. याचा राग आल्याने अंकिता यांनी त्यांच्या अंगावर पाणी टाकून त्यांना उठवले, शिवीगाळ केली आणि मारहाण सुरू केली. यावेळी संदीप आणि शिवदास यांनीही सानिका यांना मारहाण केली. संदीपने लोखंडी रॉडने त्यांच्या डोक्यावर मारून त्यांना जखमी केले. सानिका यांचे पती संजय आणि सुलोचना त्यांना वाचवण्यासाठी आले असता, त्यांनाही मारहाण करून जीवे मारण्याची धमकी देण्यात आली, असे सानिका यांनी आपल्या तक्रारीत म्हटले आहे.
दुसऱ्या बाजूची तक्रार
दुसरीकडे, अंकिता संदीप गावकर यांनीही पोलिसांत तक्रार दाखल केली आहे. त्यांच्या तक्रारीनुसार, सानिका गावकर त्यांच्या वाटणीच्या खोलीत झोपल्या होत्या. ‘तू येथे का झोपलीस?’ असे विचारले असता, सानिका यांनी रागाने त्यांना शिवीगाळ करत मारहाण केली. त्याचवेळी, सुलोचना गावकर यांनी लाकडी काठीने अंकिता यांना मारहाण केली आणि जीवे मारण्याची धमकी दिली, असे अंकिता यांनी नमूद केले आहे.
पोलिसांची कारवाई
या दोन्ही तक्रारींनंतर, पोलिसांनी सानिका गावकर यांच्या फिर्यादीनुसार संदीप, शिवदास, आणि अंकिता यांच्या विरोधात गुन्हा दाखल केला आहे. तर, अंकिता गावकर यांच्या फिर्यादीनुसार सानिका, संजय, आणि सुलोचना यांच्या विरोधात गुन्हा दाखल करण्यात आला आहे. पोलिस हवालदार सुनील वेंगुर्लेकर या प्रकरणाचा अधिक तपास करत आहेत. सामूहिक घरातील वादातून झालेल्या या हाणामारीमुळे परिसरात तणावाचे वातावरण निर्माण झाले आहे.
Subscribe
